Wilujeng enjing!, wilujeng sumping di channel sim
kuring. Ayeuna sim kuring bade cambling ka silaing. Pikeun silih geuing sareng
pika eling. Awak sim kuring jangjawing, lumayan jangjing, padahal kolot mah
jungkiring. Lembur sim kuring di tepis wiring, caket lamping, tatangkalan ting
kuriling, sabangsaning jeungjing sareng senokeling. Sasatoan ting alabring, aya
cacing, papanting, bajing, peusing, ucing, sareng munding. Dahareun sagala
nyanding, daging dina piring, sangu dina ceceting, cai dina gelas beling. Lamun
hajat sok nanggap tarling. Artisna buuk galing, bibir jeding, ceuli rebing make
anting, calana rawing katempo pingping, padahal mah malawading.
Di kota mah rungsing, kahirupan ginding, gedong nu pinding, teu
bisa lingling, loba nu curaling, mindeng murang-maring, matak babari gering.
Pangling sareng lembur sim kuring. Jalan lungkawing, gawir nangtawing, kaayaan
jempling, hawa wening, angin nyelesep ting puriding, kekembangan ngadalingding,
pas nyaring sora manuk ngahariring. Sareng tatangga nalangkring, bari ngarujak
buah gumading, sakapeung mah ngopi jarangking. Ka leuweung kencling, nini make
samping, aki manggul waring, barudak nungtun anjing rek panting.
Hirup mah durang duraring, kawas muter kikiping. Selang seling,
aya beurang aya peuting, aya nu wani aya nu kecing, aya nu getol aya nu melencing,
aya diusap aya ditampiling, aya seuri aya ngahinghing, aya nu usik aya nu
cicing, aya nu nyingsring aya nu ngising. Nu penting agama kedah dicangking,
kasaean kedah diaping, kagorengan kedah pahing, sabab maot mah gilincing, ngan
amal ibadah nu bakal ngiring.
No comments:
Post a Comment